بالله هذا محيط الواحد ينمي فيه مواهبه الديمقراطية؟

انا يعجبني ياسر ولد الزاكسن لعدة اسباب اتفهها الأتي : سي مايكل هاذا سبق بعقدين كاملين كل المبادرات لدمقرطة المنطقة الوحيدة في العالم اللي ما بلتهاش موجات التحرر وما هبتش عليها رياح سيادة الشعوب. من عام 1979 وقبل ما تخرج علينا الوصيفة الاخرى للا كوندوليزا رايس بالرويق متاع هالشرق الاوسط الكبير وما كبير كان ربي والله اكبر على امريكا ومايكل يفيق فينا غير احنا ماعيننا كان بالشطيح والرديح وهزان الوسط وحاجات اخرى السياق م يسمحش بذكرها على سبيل الذكر لا الحصر البومه الاول بعيد عالحيط حاول باش يتطرق الى مشكلة الارهاب اي نعم الارهاب ولا انتوما اش تتصوروا من حل لهلمشكلة احسن مالقضاء على افة البطالة والاخذ بيد الحيطيست او البطالة لكن الشعوب العربية ضاربتو خميري رغم تحذيرات ولد الزاكسن بوصفه الوضعهم بانو مش رديء برك بل ومخيف زاده الشعب العربي ماهو وليد حلال وخاطيه المشاكل والشبوك قعد مبهم وسلبي الاخ مايكل ماقصرش الحق مين حينه لبس الكدرون متاع بلقاسم وولى يحكي باسم الجموع ويخاطب في الحكام في مش لاهين بينا في برة زيدوا علا قدام وابركوا في بلايصكم وشيخوا فينا لين تشبعوا وساعات تتطلعلوا يولي يدعي عليهم زعما يجي انهار وتمشيو ال غادي ؟ يقصد القبر الحلوف وساعات يريض شوية ويوصفهم بالمجرمين الناعمين اهوكا زعمة زعمة كف وكعبة حلوى لكن اتعدات ليام والاعوام والشعيب مش هوني فلقط مايكل قاللهم ايا انستوا سيبوني وحدي انا ماشي للغابة اما يجي انهار وتتفكروا الكلام والوقت الي اتعدى خسارة اشبيك الراجل محسوب بخشمه وما سيب الا ما برد على داه وقال كلمته الاخيرة للحكام والشعوب على حد السواء انا الحق شاكك فيه هوا ما يطلع كان اشسموا اذاكا اللي يحكيو عليه الديمو ولا شنيه ينجيه مايكل اش عامله الكامرون يا ولد الزاكسن؟